ЖАҢАЛЫҚТАР

«Джудит жасаған қиын таңдау» - бұл отбасының барлық мүшелеріне ерекше көңіл күй сыйлайтын, көрерменді ұмытылмастай әсерге бөлейтін, ғажайыптар мен ертегі әлеміне апаратын спектакль-шоу. Аймауытов театры үшін қойылымның бір уақытта ересектер мен кішкентай бүлдіршіндерге арналғаны  алғашқы тәжірибе болды.  

Қойылым балаға анда-санда айналасына ересек адамның көзімен, ал ата-анаға баланың көзімен қарап қоюы керек екенін ескертеді.

Джудитті жас актер Дильназ Қиятова,  әке рөлін белгілі актер Руслан Нығман сомдаса, Бауыржан Манатбекұлы сиқыршы қарғаны,  тентек Нилді Ақжол Дүйсенұлы, сайқымазақтарды Арман Серікқазыев, Жасұлан Әмірхан, Жақсылық Әбдірашым, Темірлан Мұқатай, Райхан Жұмақанова ойнап шықты.

Көрермен премьералық қойылымға жоғары баға беріп отыр.

Премьераны театртанушы, өнертану кандидаты, Т.Жүргенов атындағы Қазақ ұлттық өнер академиясының профессоры, «Театр өнерінің тарихы мен теориясы» кафедрасының меңгерушісі Анар Еркебай арнайы келіп тамашалады.

- «Джудит жасаған қиын таңдау» спектаклі жоғары талаптарға жауап береді. Режиссердің ой-тұжырымының тереңдігі мен оның сахна тілі арқылы көркемдік бейне жасаудағы шеберлігі ерекше атап өтуге лайық. Күрделі философиялық және эмоционалдық астарын ашуда режиссер пластикалық шешімдерді шебер қолданған. Сахналық қозғалыстар, жарық пен көлеңкенің үйлесімі, әрекетті сценография қойылымның негізгі идеяларын айқындап, көрерменге жаңа эстетикалық әсер сыйлады,-деді сыншы.

Атап өтерлігі, бұл – режиссер Сергей Левицкийдің Аймауытов театрында тудырып отырған екінші қойылымы. Бұған дейін ол Шекспирдің «Ричард ІІІ» трагифарсын сахналаған. Ал қойылымның пластикалық режиссері – Игорь Григурко.